Parhna meri ghazal

Parhna meri ghazal, meri tehreer dekhna
Dil ka lahu hai, zeenat-e-tasveer dekhna

Hum badnaseeb they ki kati umr khwaab mein
Tum bamuraad khwaab ki taabeer dekhna

Azm-e-safar hai paas, to kis baat ki kami
Na faaslon ki fikar na zanjeer dekhna

Ab bhi hain lakh, khaka-e-bairang zehan mein
Ghaarat gard! Ye husrat-e-tameer dekhna

Lo wo bhi likh rahein hain shaheedo me apna naam
Ab jo dikhae khoobi-e-taqdeer dekhna

Maani badal gaye hain zamaane ke saath saath
Ulti hai lafz lafz ki tafseer dekhna

Kal tak jo tha sawaab, gunaah-e-azeem hai
Ain-e-sawaab ban gayi taqseer dekhna

Tareekiyo ke jism pe kirno ka hai libaas
Takhreeb-e-kaar thahri hai taameer dekhna

Bazaar misr shehr-e-khulooso wafa hai ab
Meenar-e-noor hajla-e-shab geer dekhna

Masnad nasheen qaatil-e-dauraan ke rubaroo
Naazaa kharey hai waqt ke shabbir dekhna

Aashaar sunke parne lagey abruon pe bal
Ajmal mere kalaam ki taaseer dekhna

                                                 Ajmal Ajmali

Har ujala nayi seher to nahi

Raat ki umr raat bhar to nahi

Aadmi chand gaam barh na sakey

Zindagi itni mukhtasar to nahi

Ik ujala sa saath rehta hai

Sochta hun teri nazar to nahi

Aik hungama hai bayaabaan mai

Koi amaadah safar to nahi

Waqt beshak azeem hai lekin

Mujhse tujhse azeemtar to nahi

Door kuch saaye se hain sehra mai

Raah gam kardah humsafar to nahi

Har khandar par gumaa guzarta hai

Meri yaadon ka ye nagar to nahi

Aap jo bhi kahen woh sach ajmal

Aap ab itney moatbar to nahi 

BETI

                                 BETI

Beti
Meri Beti
Tu mere maazi ka warsaa
Haal ki dawaat
Mustaqbil ki paak amaanat

Ja beti ja
Aaj tujhey mai
Apne,tere aur duniya ke mustaqbil ko saunp raha hu

Maazi,haal aur mutaqbil ke is rishtey ki laaj nibhana
Is rishtey ko bhool na jana
Ye rishta hum sab se bara hai
Ye rishta hum sab ka khuda hai

......................................................by: Ajmal Ajmali

Har baar humne bhaag ke jungle me lee panaah
Har baar humko dhoond ke layi hain bastiyaan

Naagan ki tarah dasta hai har mor har gali
Apne nahi rahe to paraai hain bastiyaan

Har mor par khilaaye hain apne lahoo se phool
Yaaron bare jatan se sajaayi hai bastiyaan

Deewaron ka hisaar hi shayad naseeb hai
Sehra me saath dene ko aayi hain bastiyaan

Bechain dil na jaane tujhey kiski talaash hai
Veeraney raas aaye na bhaayi hain bastiyaan

Ab jeete ji pahunch na sakenge waha talak
Yaaron ne itni door basaayi hain bastiyaan

Muddat par albele sajan ne khat likha is baar hume
Dar dar taake raah humari dhoonde uska pyar hume

Panghat uper sakhiyan milkar zikr humara karti hain
Ik panihaaran paagal jaisee kehti hai batmaar hume

Gard ki moti chadar orhe gaon ke raste lete hain
Is aasha me dekh saakenge shayad ab ki baar hume

Swarn paseena tan se tapke,chab dikhlae baal ki chandi
Jhar jhar barse aankh se moti log kahen nadaar hume

Ab dekhen is tan ki qeemat kitni kaun lagata hai
Ehle sitam le to aaye hai aaj saare bazaar hume

Dil ki haalat kya batlaaen reza reza toot raha hai
Kuch din thehro poochne walon chapenge akhbaar hume

 Jb Ajmal Ajmali with Jb Ghulam Rabbani Taaban and Jb Mujeeb Rizvi

WAQT-E-SAFAR

Waqt-e-safar qareeb hai bistar samet lun
Bikhra hua hayaat ka daftar samet lun

Phir jane hum mile na mile ik zara ruko
Mai dil ke aaene me ye manzar samet lun

Ghairon ne jo sulook kiya uska kya gila
Phainke hain doston ne jo pathar samet lun

Kal jane kaise honge kaha honge ghar ke log
Aankho me aik baar bhara ghar samet lun

Seele nazar bhi gham ki tamaazat se khushk hai
Wo pyaas hai mile to samandar samet lun

Ajmal bharak rahi hai zamane me jitni aag
Jee chahta hai seeney ke andar samet lun

Ajab safar tha

Ajab safar tha kahin koi saaebaan na tha

Wo phir bhi saath chalega mujhey gumaan na tha

Hayaat yun to musalsal sawaal thi lekin

Tere karam se kara koi imtehaan na tha

Hum apneaap sitare taraashte aaye

Humare sar pe kabhi koi aasmaan na tha

Ye aur baat ki lab khud hi see liye maine

Tumhari bazm me main warna bezubaan na tha

Mai sar jhuka ke raha is dayaar me warna

Kisi makaan se neecha mera makaan na tha

Usey qareeb se dekha to ye bharam toota

Mera  qusoor tha wo mujhse badgumaan na tha

KRISHANAWALI

Shyam salone, gokul ke gopal pyare

Radha ke manmeet,pukare sab tumko jagjeet

Kaha ho aao badal de milkar jag ki reet

Pukaren sab tumko jagjeet

Nand gali ke natkhat baalak,sundar maakhan chor

Gagri gagri maakhan chalke, saanp agore,chale na apna zor

Kaha ho aao badal de milkar jag ki reet

Radha ke manmeet,pukare sab tumko jagjeet

Brindaban ke bansi bajayya manmohan chitchor

Bansi ki meethi taano par nachey man ka mor

Baahar hahakaar,nafrat ka vish ghol rahe hain kanso ke avtaar

Barhti jae zulm ki badli chayi ghata ghanghor chaley na apna zor

Kaha ho aao badal de milkar jag ki reet

Radha ke manmeet,pukare sab tumko jagjeet

Mathura ke girdhar gopal brindaban me holi khelo barse gulal abeer

Taisoo ki phulwari dehke maila naddi teer

Gali gali me holi sulge mehke mahal kuteer

Paapi toley phaag uraen jashn manaen,chalke khoon ki dhaar

Band makaa me aag lagaen,jism jalaen, phunk jae pariwaar

Nanhe baalak bhaley khaen piyen nayan ke neer

Radhaon ki izzat looten dharam pujari veer

Luti bajariya khara sudama poochey tumhri raah

Seeney se baahar aatey dare dilon ki aah

Sahma sahma sannata hai toota toota shor

Hinsa ki bal khati nagin lehrae har ore, chaley na apna zor

Kaha ho aao badal de milkar jag ki reet

Radha ke manmeet,gokul ke gopal pyare ,meera ke ganshyam

Radha ke manmeet,pukare sab tumko jagmeet

AIK FASAADZADAH SHEHER

Aane walo! Isey  ibrat ki nazar se dekho

Kal talak meri tamannao ka gulshan tha yahan

Phool bhi raakh hue phool se bachcho ki tarah

Bijliyan khush hain jalakar ki nasheman tha yahan

Khwaab deewaro pe hain khoon ke dhabbe ban kar

Log kehte hain ki ik shaks ka maskan tha yahan

Ja baja bikhre hue kasa-e-sar ke tukre

Kya pata sheher tha abaad ki muddaffan tha yahan

Sir pe jo seengh ubhar aaye they ,aae na nazar

Yun to har haath me ehsaas ka darpan tha yahan

Sabhi insaan they,dil rakhte they  pehloo me sabhi

Koi afreeyat, na shaitan, na raavan tha yahan

Phir se un eento ko jorou to  samajh me aaye

Koi mandir tha ki masjid thi ki aangan tha yahan

Log ghabra ke jo nikle to kidhar ko jaate

Sir chupane ko faqat maut  ka daaman tha yahan

Aane walo ise ibrat ki nazar se dekho

Kal talak meri tamannao ka gulshan tha yahan

Ajmal Ajmali