WAQT-E-SAFAR

Waqt-e-safar qareeb hai bistar samet lun
Bikhra hua hayaat ka daftar samet lun

Phir jane hum mile na mile ik zara ruko
Mai dil ke aaene me ye manzar samet lun

Ghairon ne jo sulook kiya uska kya gila
Phainke hain doston ne jo pathar samet lun

Kal jane kaise honge kaha honge ghar ke log
Aankho me aik baar bhara ghar samet lun

Seele nazar bhi gham ki tamaazat se khushk hai
Wo pyaas hai mile to samandar samet lun

Ajmal bharak rahi hai zamane me jitni aag
Jee chahta hai seeney ke andar samet lun